Të hënën, në moshën 77 vjeçare, botën dhe qytetin tonë e lëshoi një nga gjigantët e detarisë së Ulqinit – kapedan Muzavid Bilali.
Ishte drejtues legjendar dhe një nga detarët më të vlerësuar në kompaninë e Tivarit „Prekookeanska plovidba“.
Në fundin e karrierës, me meritë e fitoi titullin më të madh në detarinë tregtare – inspektor nautik.
Me fitimin e „Shiritit të kaltër“ të të përditshmes nga Zagrebi „Vijesnik“, në vitin 1976, shpërblimit më të madh i cili në ish Jugosllavi është ndarë për arritjet siç janë shpëtimi i njerëzve dhe i pronës në det, është bërë autoritet i pakontestueshëm ndër kolegët dhe në botën e detarisë në përgjithësi.
Largimin e tij më së shumti do ta ndjejë familja, miqtë nga Rana, por edhe i tërë qyteti. Sepse, të gjithë ne që e njohëm gjithmonë kishim mundësi të dëgjojmë dhe të mësojmë diçka të dobishme nga eksperienca dhe dija e tij e madhe.
Kapedan Bilali në të ardhmen do të lundrojë në disa dete të tjerë. E ne me frikë do të shikojmë në këtë të vetmin që kemi, me platformat e naftës në detin tonë, duke kujtuar me nderim ato që e ngritën lavdinë e detarisë tonë dhe duke iu dëshiruar det të qetë në botën tjetër dhe më të mirë.