Kryetari i komunës së Ulqinit Fatmir Gjeka i dërgoi përpunuesve të Planit hapësinor-urbanistik të kësaj komunë kërkesën e kompanisë “Star of Montenegro” me të cilën kërkohet rritja e numrit të kateve për hotelin e ardhshëm “Servantes”, mëson Portali Ul-info.
Në pushtetin lokal të Ulqinit nuk e kundërshtojnë atë kërkesë meqenëse bëhet fjalë për investim me vlerë të përgjithshme prej 50 milion euro.
Siç thanë investitorët, kompania “Nedfact” nga Hollanda dhe “Starline engineering” nga Mali i Zi, kanë pranuar propozimin e operatorit të tyre hotelerik “Heliopark”, që numri i kapaciteteve akomoduese duhet të rritet nga të planifuarat 115 në 150, “në mënyrë që projekti të jetë profitabil”.
Këtë javë drejtorët e “Nedfact-it” do të qëndrojnë në Mal të Zi në mënyrë që të dakordojnë detajet për fillimin e ndërtimit të hotelit në Sukë.
