Organizata humanitare “Bereqeti” nga Ulqini në bashkëpunim me Fondin humanitar “Hilal” nga Bijelo Pole, ka përfunduar dje aksionin e rinovimit të tërësishëm të shtëpisë së familjes Veliq, në fshatin Millë, në komunë të Ulqinit.
Në shtëpizën (barakën) e vjetër, ku shiu pikonte, pa banjë dhe kushte esenciale për jetë, jeton nëna Dilba me djalin Xhaferrin.
Aktivistët e “Hilalit” iu përgjigjen ftesës nga Ulqini, kështu që dhjetë mjeshtër të zanateve të ndryshme (muratorë, mjeshtër të pllakave qeramike, të ujit, mekanikë elektrikë) nga Bijelo Pole mbas pesë ditësh punë, me përkrahjen e njerëzve të mirë, kanë ndërtuar praktikisht shtëpi të re për familjen Veliq.
Kjo është dhurata më e bukur për vit të ri për Dilbën dhe Xhaferin, e për të gjithë neve ftesë që akoma më fuqishëm të tregojmë solidaritetin me të gjithë ato që ju nevojitet ndihma.
