“Albaniada – Olimpiada e sporteve dhe lojërave tradicionale shqiptare” do të sjellë në shtator, për herë të dytë, lojërat tradicionale, të cilat sot, pak kush mund t’i dijë. Aktivitetet e “Albaniadës” edhe këtë vit do të mbahen në fshatin Kukaj të Prishtinës, në datat 14 dhe 15 shtator. Qëllimi i organizimit të këtyre lojërave, organizatorët thonë se është bashkimi i sporteve dhe lojërave të gjitha trevave shqiptare në një vend.
“Qëllimi i organizimit te “Albaniadës” është që të rikthejë në jetë sportet dhe lojërat e vjetra shqiptare sidomos për gjeneratat e reja, që të njoftohen me sportet dhe lojërat që të parët tanë i kanë luajtur, por edhe të krijojë një ngjarje që do të tërheq interesimin e turistëve dhe kureshtarëve të tjerë nga rajoni dhe bota” ka thënë për gazetën Leart Zeqa, drejtor i kompanisë organizatore, MODUS, kompani kjo që për të dytin vit tashmë është organizatore e Albaniadës.
Për dallim nga një vit më parë, sivjet organizimi i lojërave tradicionale do të ketë karakter garues, ndërkaq, ansamblet do të mund të luajnë lorëja të ndryshme që nuk do të jenë pjesë e garës, që përveç lojërave do të prezantojnë edhe veshje të ndryshme tradicionale.
”Albaniada” do të ketë karakter garues dhe ngjarja do të kulminojë me shpalljen e kampioneve në një numër prej 24 sporteve të vjetra”, ka thënë Zeqa. (Zëri)
