“Ngjarjet e fundit me tepër i ngjajnë ndonjë seriali latinoamerikan apo “Farmës” së Orvellit. Është më se evidente që kryetari i komunës nuk e ka përkrahjen e shumicës në Parlamentin lokal për raportin e punës për vitin 2012”, thuhet në një deklaratë të lëshuar nga Mali i Zi Pozitiv.
Sipas fjalëve të anëtarit të Këshillit qendror të kësaj partie Safet Beci, mënyra se si u formua shumica parlamentare është e pamoralshme. “Mirëpo më i pamoralshëm është qëndrimi i tanishëm i cili është në këmbët e brishta dhe ajo qe e mban janë interesat e prijësve politik në pushtet dhe mosinteresim për zgjedhje të parakohshme nga ana e PDS-së, me të cilin po sillen në mënyrë servile të dy subjektet politike shqiptare në pushtet”, tha ai dhe shtoi se “përfundimisht, ky pushtet nuk ka legjitimitet, nuk e ka përkrahjen e popullit dhe nuk është në interesin publik”.
Beci theksoi se “sot në Ulqin kemi një situatë me humbës politik, qe nuk e kuptojnë humnerën e humbjes, por sillen në mënyre absurde si fitues, dhe nuk e kuptojnë se po kalojnë nga hija në errësirë të gjatë”.
Ai i bëri thirrje kryetarit të komunës Nazif Cungut që të hap zgjedhjet e parakohshme që të dilet nga “kjo parodi politike dhe shoqërore”.
