Kur në vitin 1968 vendosën të emigrojnë në SHBA në kërkim të një jete më të mirë, Huseini dhe Ese Beqoviq s’mund ta paramendonin që vetëm disa vjet më vonë do ta realizojnë ëndrrën amerikane.
Të dy bashkëshortët vetëm pesë vjet më herët e lëshuan Pistullën dhe Ulqinin dhe shkuan në Francë. Mirëpo, në Paris nuk qëndruan gjatë, sepse e kanë ditur dhe ndjerë që Amerika është vendi i ëndrrave të tyre.
Pas ardhjes në SHBA kanë punuar me zell dhe mundim punën e bojaxhiut, respektivisht pastrueses deri në vitin 1972 kur bënë biznesin e parë. Kanë blerë ndërtesën e parë me 24 njësi duke huazuar paratë nga miqtë.
Vetëm pas një viti kthyen tërë paratë e huazuara.
Prej atëherë, për gati pesë dekada, kjo familje, tani e shumtë në numër, vazhdon që me punë të dedikuar, me përgjegjësi dhe guxim të arrijë rezultate të shkëlqyera në të gjitha fushat.
Huseini dhe Esja arritën që këto vlera t’ia kalojnë katër fëmijëve të tyre, të cilët arritën karriera të suksesshme.
Kanë biznes të zhvilluar me patundshmëri, respektivisht posedojnë banesa familjare me mbi 4000 njësi. Biznesin e administrojnë djemtë dhe stafi në katër shtete federale: Ilinois, Indiana, Florida dhe Viskonsin.
Njëkohësisht, Beqoviqët jetojnë në fermë në Mareng, Ilinois, ku mbajnë bagëti, punë të cilën e kanë bërë edhe paraardhësit e tyre në Pistullë.
Dëshira për të ndihmuar vendlindjen i nxiti që në vitin 2005 të hapin biznes edhe në Mal të Zi, në Ulqin. “Beqoviq Managment Group“ (BMG) bleu hotelin “Mediteran”, i cili deri në vitin 2025, pas investimet mbi 13 milion euro, do të bëhet brendi turistik i Ulqinit.
Përveç biznesit, familja Beqoviq është gjithmonë e përkushtuar ndaj komunitetit. Është e njohur si përkrahëse aktive e disa organizatave humanitare në SHBA dhe në zonat ku jetojnë Shqiptarët.
