Dizajnuesja Edita Nimanbegu – Baroviq mori pjesë në Mionetto Prosecco Fashion Week Montenegro i cili filloi mbrëmë në Podgoricë, nën organizimin e Dhomës së Modës së Malit të Zi, duke shfaqur koleksionin “Untold”.
“Koleksioni u inspirua nga legjenda e Ulqinit, njëjtë si koleksioni paraprak, por kësaj radhe ishte legjenda për zanat të cilët ruajnë thesarin e mbretëreshës Ilire Teuta. Bëhet fjalë për vendin në Valdanos të cilin e quajnë edhe Kroi i Zanave. Prej aty nisi ideja dhe pastaj thjeshtë u ndërlidha. Janë prezantuar të gjithë zanat – ajo e pyllit, fushës, të mirat dhe të këqijat”, tha Nimanbegu – Baroviq për Magazinën MNE pas sfilatës.
Përndryshe, edhe këtë vit skenën për Fashion Week Montenegro e punoi Leo Jankoviq nga LG design në Ulqin.
