Sezoni i sivjetmë turistik në Ulqin praktikisht fillon me hapjen e hoteleve. Mbasi që dyert e veta i ka hapur hoteli të cilin e menaxhon Fondi i sigurimit pensionist – invalidor në Plazhin e vogël, këtë gjë me 14 prill do ta bëj dhe hoteli “Albatros”. “Pesë ditë më vonë pritet ardhja e grupeve të para të turistëve”, na tha drejtori i këtij hoteli Xhemal Bushatliq.
Kah fundi i këtij muaji do të hapen dhe objektet e Ndërmarrjes hoteletike – turistike “Riviera e Ulqinit”. Sezonin në hotelet “Olimpik” dhe “Belvi” pritet që ta hapin turistët nga Çekia në fillim të majit, sepse agjencitë e njohura nga ky vend, ndër të tjera edhe “Kovaturs”, kanë marrë me qira numër të konsiderueshëm shtretërish për sezonin e ardhshëm në ndërmarrjen më të madhe hotelerike në Ulqin.
