Vlerësohet se në Ulqin regjistrohet çdo i katërti mysafirë, prandaj institucionet shtetërore dhe ato të Komunës kanë nisur fushatën që kjo gjendje të ndryshohet.
Ministri Malazez i turizimit Pavle Radulloviq deklaroi se në kulmin e sezonit të vitit 2018, qyteti humb gjysmë milioni euro në javë për shkak të mospagesës së taksës së banimit.
Synimi më i rëndësishëm i fushatës është rregullsia e punës të të gjithë atyre që merren me qiradhënien e kapaciteteve akomoduese. Ato ftohen që prej tani të marrin të gjithë lejet e nevojshme për ushtrimin e veprimtarisë të cilën e japin organet e vetëqeverisjes vendore si dhe të jenë në regjistrin e përgjithshëm tatimor.
Është paralajmëruar se do të kontrollohen edhe qiradhënësit e akomodimit në platformat e internetit, siç është Booking-u.
Kontrolli i turistëve se a e kanë paguar taksën e banimit në objektet ku ishin të akomoduar do të bëhet edhe kur të lëshojnë shtetin, gjegjësisht në pikat kufitare dhe në aeroporte.
