Shumë kontroversa e kanë ndjekur procesin e privatizimit të Kripores dhe presim që dora e drejtësisë më në fund ta prekë edhe Kriporen e Ulqinit, than për Portalin RTMZ nga kabineti i nënkryetarit të Qeverisë së Malit të Zi, Dr. Dritan Abazoviq.
Siç thanë, është e paimagjinueshme se si një unikat kaq i vlefshëm ekologjik në Mal të Zi, me sipërfaqe prej 15 milion metrash katror, u vlerësua asokohe 800 000 euro.
“Ndërmarrja falimentoi për shkak të borxhit për energji elektrike prej 14 000 euro për hapësirën e cila vlen 250 000 000 euro. Edhe qytetarët e panjoftuar do ta kenë të qartë se si me procesin e privatizimit paralelisht ka shkuar tentativa e devastimit dhe plaçkitjes së Kripores”, theksuan nga kabineti i nënkryetarit të Qeverisë.
Ato thanë që presin reagimin e prokurorisë të çliruar nga ndikimi politik i strukturave nga pushteti i kaluar.
“Është me rëndësi të përmendet që shumë procese të privatizimit të gjigantëve të dikurshëm ekonomik ishin plaçkitje klasike e pronës shtetërore dhe ky është fakt tashmë i njohur. Pikërisht për këtë arsye besojmë se prokuroria, e çliruar nga ndikimi politik i strukturave nga pushteti i kaluar më në fund do të marrë përsipër rolin e vet të përcaktuar me Kushtetutë dhe do të merret me aferat e shumta korruptive që ndodhën gjatë dekadave të kaluara. Padyshim që i pretë shumë punë”, thanë nga kabineti i Abazoviqit.
