Komuna e Ulqinit do t’I dërgojnë regjioneve të goditura nga përmbytjet dhe popullsisë së rrezikuar në Serbi dhe Bosnje dhe Hercegovinë nga dy mijë euro ndihmë. Po ashtu, Komuna është e gatshme që gjatë sezonit turistik të mirëpresë fëmijët nga qytetet e rrezikuara.
Në letrat të cilat kryetari i komunës së Ulqinit Fatmir Gjeka i ka dërguar Ambasadorëve të Republikës së Serbisë dhe Bosnjës dhe Hercegovinës, Prof. Dr. Zoran Bingulac dhe Izmir Taliq, thuhet që qytetarët e Ulqinit me vëmendje të veçantë ditë me radhë kanë përcjell situatën në zonat e përmbytura të Serbisë dhe Bosnjës dhe Hercegovinës dhe janë solidarizuar me të gjithë ato që i ka goditur kjo fatkeqësi e rëndë.
“Po ashtu, vlen të përmendet që të gjithë qytetarët e Ulqinit ishin unik në mbledhjen e ndihmave dhe të gjithë individualisht kanë kontribuar për popullsinë e rrezikuar të Serbisë dhe Bosnjës dhe Hercegovinës”, thuhet në letrat e nënshkruara nga ana e kryetarit Fatmir Gjeka.
