Sot është organizuar takimi i institucioneve kompetente me qëllim të zgjidhjes së problemit të lypjes, i cili është shumë i theksuar në komunën e Ulqinit, sidomos gjatë sezonit turistik veror.
Në takim morën pjesë nënkryetarja e Komunës së Ulqinit Hadixha Gjoni, Shërbimi i Policisë Komunale, Departamenti i Sigurisë Ulqin dhe Stacioni i Policisë Kufitare Sukubinë, Qendra për Punë Sociale Ulqin, përfaqësues të hotelierëve dhe restoranteve, Shoqata e Plazhistëve dhe Bashkësia Islame Ulqinit.
Të pranishmit u pajtuan se lypja është një problem serioz që kërkon një zgjidhje të mirëfilltë sepse ka një ndikim të theksuar negativ në sezonin turistik dhe imazhin e komunës. Është veçanërisht shqetësues fakti që fëmijët e mitur keqtrajtohen në mënyrë të organizuar për të lypur.
