Partia demokratike e socialistëve ka shprehur pakënaqësinë që akoma nuk janë emëruar kuadrot të cilat ajo i ka përcaktuar për vendet në pushtetin ekzekutiv në Ulqin, mëson Portali Ul-info.
Për këtë arsye nesër mbrëma, me kërkesë të drejtuesve të partisë në Ulqin dhe shefit të Parlamentit komunal Loro Nrekiq, do të mbahet takimi i liderëve të koalicionit qeverisës.
Edhe në Unionin demokratik të Shqiptarëve të Mehmed Zenkës vlerësojnë që procesi i konstituimit të pushtetit dhe emërimi i drejtorëve të rinj të ndërmarrjeve publike duhet të ec më shpejtë meqenëse në mbledhjen e Kuvendit komunal të mërkurën janë zgjedh anëtarët e këshillave drejtues dhe po afrohet sezoni turistik.
Pritet që këto ditë më në fund të dihen edhe emrat e anëtarëve të Forcës për funksionet që i takuan kësaj parti. Beteja e ashpër brendapartiake po bëhet rreth vendit të nënkryetarit të Komunës dhe drejtorit të Organizatës turistike.
Në Partinë demokratike të Fatmir Gjekës akoma presin për cilin funksion do të përcaktohen partnerët e tyre nga Lëvizja qytetare “Perspektiva” e Amir Hollajt (nënkryetarin e Komunës, drejtorin e Qendrës për kulturë apo atë të RTV “Ulqinit”), në mënyrë që të propozojnë kuadrot e veta për karriget e boshatisura.
