Valdanosi është simbol i Ulqinit, komponim unik i ndikimit të natyrës dhe dorës së njeriut dhe prandaj është e nevojshme që i tërë ky gji, duke përfshirë edhe nëndetin, të shpallet zonë e mbrojtur, njoftuan nga Monitoring grupi Ulqin (MOGUL).
Thuhet që së shpejti do të fillojë grumbullimi i nënshkrimeve të qytetarëve, ndërsa pas kësaj iniciativa për shpalljen e Valdanosit park të natyrës do të dërgohet në Parlamentin lokal.
Plazha në gjirin e Valdanosit është shpallur përmendore e natyrës në vitin 1968.
“Beteja për shpëtimin dhe ruajtjen e Valdanosit nuk ka përfunduar. Sot duhet të vazhdojmë me vendosmëri akoma më të madhe. Rreziku i ri i kanoset të gjithë resurseve tona hapësinore. Ligji i ri për planifikim hapësinor i zbulon plotësisht ambiciet e atyre që kanë shkatërruar ekonominë e Ulqinit, që me resurset tona më të shtrenjta të disponojnë pa ndikimin e qytetarëve dhe të vetëqeverisjes lokale”, shtojnë nga MOGUL-i.
