Kreu i shtetit shqiptar, Bujar Nishani zgjodhi ditën e ngritjes së flamurit në Vlorë për të nderuar personalitetet e shquara të pavarësisë, si Isa Boletini, Mujo Ulqinakun, Ymer Dishnicen, Mustafa Gjinishin, Qemal Stafën, kryetarin e Konferencës së Pezës, Abaz Kupin, nacionalistët Lepenica dhe Butka, shkruan Shekulli.
Në mesazhin drejtuar gjithë shqiptarëve, Nishani u shpreh se kjo ditë është e shënuar për shtetin shqiptar dhe se sot më shumë se kurrë, duhet t’i përulemi mundit dhe sakrificës që Ismail Qemali, Isa Boletini dhe personalitetet e tjera të pavarësisë dhanë për Shqipërinë. “Nderojmë personalitete të shquara të rrugës së gjatë të mundimshme të pavarësisë së Shqipërisë, që ruajtën parimet e lirisë, pavarësisë, personalitete të përkushtuar me mish e me shpirt përmes patriotizmit dhe punës për çështjen kombëtare shqiptare”, tha Nishani.
Nishani tha se dita e 28 nëntorit është momenti më domethënës që gjithë shqiptarët pa dallim bindjesh dhe përkatësisht të vlerësojnë përpjekjet shekullore, që shqiptarët kanë bërë për të ruajtur identitetin kombëtar.
Lista e personaliteteve që u dekoruan nga Presidenti Nishani
Titulli i “Flamurit Kombëtar”
1. Isa Boletini
Titulli “Gjergj Kastrioti Skenderbeu”
2. Jonathan Moore
Titulli “Nderi i Kombit”
3. Matteo Mandala
4. Mark Krasniqi
5. Idriz Ajeti
6. Ali Aliu
7. Ymer Dishnica
8. Hysni Lepenica
9. Safet Butka
10. Medar Shtylla
11. Abaz Kupi
12. Mustafa Gjinishi
“Dekorata e Artë e Shqiponjës”
13. Mujo Ulqinaku
14. Qemal Stafa
