Me rastin e shënimit të 65 vjetorit të themelimit të Organizatës së të verbërve të Tivarit dhe Ulqinit në Tivar është futur në punë biblioteka me zë, e dedikuar për persona me shikim të dëmtuar. Biblioteka me zë funksionon në kuadër të bibliotekës së qytetit dhe sallës së leximit “Ivo Vuçkoviq”, shkruan Barinfo.
Kryetari i Organizatës së të verbërve të Tivarit dhe Ulqinit Vesellin Joketiq ka shprehur falënderimin Komunës së Tivarit për përkrahje bujare që i bënë punës së kësaj organizate dhe pohoi që në bibliotekë për momentin gjenden 160 tituj.
“Para së gjithash dëshiroj ti shpreh falënderim Komunës së Tivarit e cila gjithmonë përkrah iniciativat tona dhe pa të cilën këtë projekt nuk do të kishim mundësi ta realizojmë. Biblioteka me zë është hapur zyrtarisht në vitin 2006, por për shkak të problemeve teknike puna e saj ishte me vështirësi. Sot në bibliotekë kemi 160 tituj të cilët janë të regjistruar në formatin mp3 dhe të cilët do të jenë në dispozicion jo vetëm qytetarëve me shikim të dëmtuar, por edhe të gjithë qytetarëve tjerë”, tha Joketiq.
