Ish-ministri i Jashtëm shqiptar, Paskal Milo, është i bindur se qeveria e re e Shqipërisë, e drejtuar nga zoti Edi Rama, do të ketë nëj qasje më pozitive me vendet e rajonit dhe do të jetë më e hapur për bashkëpunim, se sa qeveria në ikje.
“Qeveria e re shqiptare, që do të marrë mandatin javën që vjen, jam i sigurt se do të ketë një qasje akoma më të shëndetshme në marrëdhëniet me të gjitha vendet e rajonit. Do të jetë më pak e indoktrinuar, do të ketë një qasje më pozitive për të ndërtuar marrëdhënie më të shëndetshme mirëkuptimi dhe bashkëpunimi, duke larguar edhe ndonjë hije të nacionalizmit të tepruar, që mund të ketë pasur qeverisja e mëparshme në raportet me rajonin dhe me vendet e tjera”, tha Paskal Milo.
Ish-kryediplomati shqiptar i bëri këto komente në Shkup, gjatë një debati lidhur me nevojën e pajtimit mes popujve, 100 vjet pas luftrave ballkanike. Panelistët pjesëmarrës në këtë debat ranë dakord se pajtimi është i mundshëm, nëse popujt e rajonit lirohen nga paragjykimet dhe politikanët nga veprimet populiste. /
