Në kabinetin e kryetarit të komunës së Ulqinit Fatmir Gjeka sot është nënshkruar Kontrata me kompaninë gjermane “Sachsenwasser”, e cila do të jetë konsultues i NP “Ujësjellës dhe kanalizime – Ulqin”.
Realizimi i këtij projekti do të kushtojë 971 mijë euro dhe është siguruar me donacionin e KfW bankës gjermane, dhe do të fillojë në shtator. Në tre vitet e ardhshme kjo kompani nga Lajpcigu do ndihmojë në rritjen e cilësisë së punës në “Ujësjellësin” e Ulqinit, në kuadër të projektit “Përmirësimi i infrastrukturës së ujësjellësit dhe kanalizimit në komunë të Ulqinit”.
Sipas fjalëve të ministrit për zhvillim të qëndrueshëm dhe turizëm Branimir Gvozdenoviq, bëhet fjalë për projektin me vlerë 25,6 milion euro, i cili paraqet parakushtin kryesor për zhvillimin e turizmit dhe realizimin e një sërë investimesh.
Me Gjekën dhe Gvozdenoviqin, këtë kontratë e nënshkruan dhe përfaqësuesi i “Sachsenwasser” Juergen Wummel dhe drejtori i “Vodacom” Boris Vukoviq.
