“Me këtë projekt dëshiruam që të tregojmë se Kriporja është botërore, por e ynja”, thanë artistët e Ulqinit në përurimin e këngës dhe kripit “Artists for Salina”.
Sipas fjalëve të producentit Enkela Bisha, qëllimi i artistëve ishte që të zgjojnë vetëdijen e qytetarëve dhe të tregojnë se Kriporja për shkak të vlerave të saja unike nuk duhet të jetë brengë e vetëm disa njerëzve por e tërë komunitetit.
Në bazë të reagimeve që ishin në përurimin e kripit të shtunën në mbledhjen solemne të Kuvendit komunal të Ulqinit, puna dymujore e artistëve është patjetër e suksesshme.
Autorja e kësaj “kënge të dashurisë dhe shpresës” Flutur Mustafa tha se ky është kontribut i vogël, por i madh për qytetin.
Muzikën e kompozoi Imi Nimanbegu, për kostumografi u përkujdes Qyle Duraku, ndërsa xhirues ishte Gëzim Mavriqi.
Përndryshe, klipi dhe kënga është pjesë e projektit AWARENESS (vetëdija), i cili u realizua në bashkëpunim me Shoqatën “Dr. Martin Schneider – Jacoby”.
Drejtuesja e kësaj shoqatë Zenepa Lika falënderoi të gjithë ato që morën pjesë në këtë projekt duke shtuar se është e kënaqur që mundi dhe aktivizmi shihet dhe vlerësohet.
