Koha kalon si një “torpedo”, thotë një miku ynë nga Rana. Dhe, me të vërtetë, sikur të ishte dje, kaluan plot 11 vite nga 3 qershori i vitit 2013, pra nga formimi i Portalit Ul-info.
Ishte një periudhë shumë kërkuese, por me kënaqësi mund të themi se gjithçka që e kemi menduar, e kemi realizuar. Madje, edhe shumë më tepër se kaq. Jemi bërë medie e komunitetit, kemi studion tonë televizive, botojmë libra dhe publikime. Jemi pjesë e respektuar e komunitetit mediatik në Mal të Zi, bashkëpunojmë ngushtë me kolegë gazetarë dhe pothuajse çdo ditë publikohen informacionet tona.
Të gjitha hulumtimet tregojnë se jemi portali më i lexuar në këtë komunë. Kjo na obligon që të vazhdojmë të punojmë me më shumë energji dhe përkushtim, për të rritur më tej cilësinë e faqeve tona.
Ndjejmë nevojën të falënderojmë lexuesit dhe ndjekësit tanë besnikë, veçanërisht partnerët dhe miqtë tanë, të gjithë ata që na kanë ndihmuar në realizimin e misionit tonë.
Faleminderit të gjithëve për mbështetjen, kohën që ndani për të lexuar shkrimet tona, si dhe për çdo kritikë dhe këshillë qëllimmirë.
Rrugëtimi ynë së bashku vazhdon!
Me respekt,
Kryeredaktori Mustafa Canka
Administratori Admir Gjoni
