Bedenat e Kalasë prapë po shemben dhe nevojitet reagimi i shpejtë i ekspertëve të cilët sa më urgjentisht duhet të sjellin planin për sanim, thuhet në përfundimin e skuadrës së ekspertëve të Qendrës për Konservim dhe Arkeologji të Malit të Zi.
Ekspertët e këtij institucioni vizituan terrenin dhe hartuan raportin të cilin e dërguan pranë Ministrisë së Arsimit, Shkencës, Kulturës dhe Sportit, Drejtorisë për Mbrojtjen e të Mirave Kulturore dhe institucioneve të kulturës në Ulqin. Mirëpo, akoma pritet reagimi i institucioneve kompetente.
Përndryshe, në raportin e Qendrës theksohet se është tërësisht e sigurt se shkak i devastimit, në masën më të madhe, ishte pakujdesi dhe mungesa e masave parandaluese të mbrojtjes. Si rezultat kemi përqindje të lartë të vegjetacionit të egër, me rrënjë të fortë dhe të shpërndarë, i cili gjendet në cepin e zonës së shembjes, si dhe mbeturinave inerte të grumbulluara artificialisht.
