Kryetari i Republikës së Kosovës Hashim Thaçi ka biseduar sot në Prishtinë me përfaqësuesit e lartë të Komunës së Ulqinit.
Thaçi për mundësitë e zgjerimit të bashkëpunimit bisedoi me kryetarin e Kuvendit komunal Loro Nrekiq, nënkryetaren e Komunës Hadixha Gjonin, deputetin në Kuvendin e Malit të Zi Luigj Shkrelin, sekretarin për ekonomi Milazim Mustafen dhe drejtoreshën e Organizatës turistike Zana Sarvan.
Në një pritje të përzemërt dhe respektuese u shkëmbyen edhe qasjet aktuale të marrëdhënieve të shkëlqyeshme në mes të Malit të Zi dhe Kosovës. U vlerësua se anëtarësimi tashmë i sigurt i Malit të Zi në NATO do të kontribuojë në stabilizimin politik të rajonit.
Gjatë takimit u bisedua edhe për çështjet aktuale lidhur me përgatitjen sa më të mirë të sezonit turistik në komunë të Ulqinit. Duke e çmuar faktin se pjesa dërmuese e mysafirëve që vijnë në këtë komunë janë nga Kosova, u çmua i nevojshëm lehtësimi maksimal i qarkullimit të tyre, veçanërisht në pikën kufitare Muriqan-Sukubinë.
Delegacioni i Ulqinit prej të mërkurën është në Prishtinë me rastin e panairit tradicional të turizmit.
