Kryetari i Komunës së Ulqinit Z. Nazif Cungu dhe kryetari i Kuvendit Z. Loro Nrekiqi zhvilluan një takim me punëtorët e administratës lokale.Fillimisht kryetari Cungu duke i përshëndetur nëpunësit e Komunës tha se tani kemi një realitet të ri përsa i përket skenës politike. Duke e cilësuar situatën financiare në Komunë dhe në ndërmarrjet që financohen nga buxheti si shumë të rënduar – pothuajse alarmante, numri një i komunës shprehu optimizmin e tij se nga kjo situatë mund të dilet. Por, për këtë ai kërkon angazhim të të gjithë të punësuarve, disiplinë dhe punë permanente. Si prioritare Nazif Cungu veçoi përgatitjen e buxhetit dhe sezonin turistik. Ai tha që dyert e tija do të jenë përherë të hapura për secilin punëtorë për çdo ide që ata do të kenë e është në interes dhe dobi të qytetit.
Vlerësime të ngjashme dha dhe kryetari i Kuvendit Loro Nrekiqi . Ai veçoi që në rrugëtimin që na pret mund të llogarisim në përkrahjen e Qeverisë së Malit të Zi. Fillimisht zyrtarët e lartë komunal patën takim me kryeshefat dhe udhëheqësit e sekretariateve.
Në adresë të tyre sot kanë mbërritur telegrame të shumta urimi nga kolegë dhe zyrtarë të qyteteve të ndryshme dhe asociacioneve.
