“Pushteti aktual në Ulqin ka shpenzuar dëshirën për ndryshime. Kur i shoh si punojnë ndjehem pakëndshëm për kritiken që i bëra pushtetit të kaluar”, deklaroi kryetari i Këshillit komunal të Partisë socialiste popullore Andrija Qetkoviq.
Ai në intervistën për Radio Ulqin tha që ky pushtet duhet të pranoi që koncepti i tyre dështoi dhe që si zgjidhje e vetme e ndershme për daljen nga kjo situatë është kthimi i mandatit qytetarëve.
Sipas fjalëve të tija, mbledhja e ndërprerë e Kuvendit komunal duhet të përfundoj deri më 31 korrik për më tepër se në rend të ditës janë shumë pika të rëndësishme. “Jam tepër i pakënaqur me raportin e punës së kryetarit të komunës Nazif Cungu për vitin 2012 dhe ai nuk meriton notë kaluese”, tha Qetkoviq.
Ai shprehu bindjen që disa ndërmarrje publike, themelues i të cilëve është vetëqeverisja lokale, janë djep i korrupsionit.
