Hyrje-daljet përgjatë gjithë autostradës së Kombit që lidh Shqipërinë dhe Kosovën janë diçka normale, duke parë gjendjen e krijuar, ndërsa veçanti tani përbën vjedhja e sinjalistikës.
Tabelat sinjalizuese janë hequr në shumë pjesë të kësaj autostrade, e po kështu janë dëmtuar elementet fosforeshente të vendosura për orientimin e drejtuesve të automjeteve.
Që nga hyrja e Rrëshenit dhe deri në Kalimash, tabelat kryesore në anë të rrugës janë hequr plotësisht, e po kështu janë hequr edhe ato të vendosura në mes të autostradës që sinjalizojnë devijimet dhe përcaktimet e ndryshme të lëvizjes në këtë aks rrugor.
Ndonëse kjo situatë vlerësohet si tepër shqetësuese, deri më tani asnjë person nuk është ndjekur penalisht për dëmtimin e autostradës, por ndërkohë Autoriteti Kombëtar i rrugëve nuk ka ndërhyrë për të rivendosur sinjalistiken e dëmtuar.
Vjedhja e tabelave sinjalizuese përgjatë autostradës së kombit ka ndodhur pikërisht gjatë kohës që ky segment kishte fluksin më të madh të lëvizjes së automjeteve për sezonin veror. /Shekulli Online/
