„Partia demokratike socialiste do të vazhdoj të jetë opozitë në Ulqin deri në zgjedhje të reja“, deklaroi funksionari i kësaj parti Luigj Shkrela.
Ai për „Dnevne novine“ tha që zgjedhjet në këtë komunë mund të mbahen jo më vonë se në shtator të vitit 2014, duke shtuar që do të ishte më mirë të mbahen në pranverë, kur u planifikuan dhe në shumë qytete tjera malazeze.
„I gjithë faji për gjendjen aktuale në Ulqin është i koalicionit i cili ushtron pushtetin“, tha Shkrela duke theksuar që pushteti i tanishëm e ka merituar të shkoj në të njëjtën mënyrë siç ka ardhur.
Deputeti i „Malit të Zi Pozitiv“ Dritan Abazoviq tha që zgjedhjet në Ulqin është dashur të mbahen nga mesi i nëntorit, por qeverisja i ka penguar. „Kjo është e palejueshme në një shoqëri demokratike dhe dëshmi e papjekurisë që mbizotëron tek ne“, theksoi ai.
Sipas fjalëve të tija, është realisht e pritshme që zgjedhjet të mbahen në pranverë, sepse pushteti aktual nuk i ka prioritet qytetarët. „I vetmi preokupim është si të qëndrojnë një ditë më gjatë në pozitat e veta“, përfundoi Abazoviq.
