Turistët që qëndrojnë në Ulqin në përgjithësi e perceptojnë kuzhinën lokale shumë pozitivisht, ku më shpesh theksojnë cilësinë e ushqimit, autenticitetin e përvojës, çmimet e përballueshme dhe shërbimin e mirë, ndërsa atmosfera dhe qëndrimi i stafit janë faktorë të rëndësishëm që e formësojnë më tej përvojën e përgjithshme. Faktori më i rëndësishëm në kënaqësinë e mysafirëve është ekuilibri midis cilësisë së ushqimit dhe çmimit, dhe ndjenja se kanë marrë një përvojë të vërtetë për paratë e shpenzuara.
Këtë e tregon një sondazh i kryer nga Portali Ul-info në platformën ECR gjatë korrikut dhe gushtit me 182 të anketuar.
Rezultatet konfirmojnë se gastronomia luan një rol të rëndësishëm kur mysafiri zgjedh një destinacion pushimi. Numri më i madh i të anketuarve e vlerësuan rëndësinë e saj me notën 4 (28.1%) dhe 5 (20.4%) në një shkallë nga 1 (aspak e rëndësishme) deri në 5 (jashtëzakonisht e rëndësishme), gjë që tregon se pothuajse gjysma e të anketuarve e konsiderojnë gastronominë një faktor të rëndësishëm ose jashtëzakonisht të rëndësishëm kur planifikojnë një udhëtim.
Kur bëhet fjalë për llojin e ushqimit që preferojnë të provojnë, 58.6% e të anketuarve preferojnë gatimet tradicionale vendase, ndërsa 41.4% janë të interesuar për ushqimin e shpejt (street food).
Por, pavarësisht interesit të madh për gastronominë, vetëm 10.3% e të anketuarve erdhën në Ulqin vetëm për përvojën gastronomike, ndërsa numri më i madh i mysafirëve qëndruan në Rivierën e Ulqinit për bukurinë e saj natyrore.
Përvojat më tërheqëse gastronomike për të anketuarit janë vizitat në Treg të gjelbërtë dhe evente (67.5%), darka në restorante të famshme (25.2%), dhe degustacione vere dhe birre (7.3%).
Së fundmi, shumica e të anketuarve tregojnë gatishmëri për të promovuar destinacionin – 65.3% do ta rekomandonin Ulqinin te miqtë e tyre vetëm për shkak të gastronomisë, 29% ndoshta, dhe vetëm 5.7% nuk do ta bënin këtë.
Të anketuarit theksojnë, 78 përqind, se shumica e restoranteve nuk ofrojnë specialitete të kuzhinës vendase, dhe se kombinimi i gastronomisë dhe hapësirës do ta bënte përvojën e Ulqinit të veçantë (82.5 përqind). Në këtë kontekst, manifestimi “Dita e bamjes”, i cili zhvillohet në Kala, përmendet veçanërisht si një shembull i shkëlqyer.
Sa i përket konsumit, 42.7% e të anketuarve shpenzojnë mesatarisht midis 20 dhe 50 euro për person në ditë për ushqim dhe pije, ndërsa 39% shpenzojnë midis 50 dhe 80 euro, kurse 11% më shumë se 80 euro në ditë. Vetëm 7.3% shpenzojnë më pak se 20 euro. Rreth një e treta e shpenzimeve të turistëve në Ulqin lidhet me ushqimin.
Rezultatet e anketës tregojnë një interes në rritje për gastronominë, veçanërisht si një motiv shtesë për udhëtime. Vendimmarrësit në Ulqin duhet të theksojnë më fort historinë lokale të ushqimit, duke përfshirë recetat tradicionale, trashëgiminë kulturore dhe praktikat miqësore me mjedisin, në mënyrë që ky qytet të ketë një identitet gastronomik të dallueshëm.
Prandaj, gastronomia në këtë komunë ka potencial të madh për zhvillim të mëtejshëm dhe mund të bëhet një nga elementët kryesorë të strategjisë së pozicionimit turistik. Në këtë kontekst, është e nevojshme të investohet në promovimin, cilësinë dhe autenticitetin e ofertës gastronomike, në mënyrë që Ulqini të forcojë pozicionin e tij konkurrues në tregun turistik rajonal dhe evropian në planin afatgjatë.
Ky tekst u krijua në kuadër të projektit “Kultura e kuzhinës: të gjitha shijet e Ulqinit”, i cili financohet nga Ministria e Kulturës dhe Medias, nga Fondi për Nxitje të Pluralizmit dhe Diversitetit të Medias. Përmbajtja e këtij teksti është përgjegjësi e vetme e OJQ-së “Ul info” dhe nuk pasqyron domosdoshmërisht pikëpamjet e Ministrisë.
