Pas gati shtatë vjetësh në një pension të merituar, në Ulqin në moshën 83-vjeçare ka vdekur Maksut Tivari, një nga kapidanat më të njohur ulqinak. Dhe shkoi në legjendë!
Ai ishte kapidan i një grupi ujqërsh të detit të Ulqinit, ku përfshiheshin edhe, le të përmendim vetëm më të njohurit, Shaqir Pekun dhe Muzavid Bilalin.
Maksuti është brezi i tretë i detarëve në familjen e tij, e cila ende vazhdon këtë punë.
Fakti që kapidan Maksuti do të mbetet i patejkalueshëm është se ai arriti karrierën më të gjatë dhe një nga më të suksesshmet në historinë e detarisë ulqinake: lundroi në oqeanet dhe detet e botës për 55 vjet!
Kjo sigurisht nuk është një fenomen vetëm për Ulqinin, por padyshim në përmasa globale.
Kapidan Tivari, pra, mbi pesë dekada e përhapi emrin dhe famën e Ulqinit në mbarë botën dhe në vitet e fundit të karrierës së tij ishte kapidan i njërës prej anijeve më të mëdha në botë – gati 400 metra e gjatë.
Ndonëse vizitoi dhjetëra herë të gjithë globin, Maksuti ishte më së shumti i përkushtuar ndaj familjes, Ranës dhe qytetit të tij.
Do të na mungojnë fjalët e tij të ngrohta dhe përvoja e madhe. Në të ardhmën do të kemi vetëm kujtime për këtë njeri të madh.
Deti i qetë i përjetësisë për ty, kapidan!
