Ministri i punëve të jashtme të Republikës së Turqisë Ahmet Davutogllu ka qëndruar të premten në një vizitë të shkurtër Ulqinit. Ishte e paralajmëruar që ai do të fal namazin e xhumasë në Xhaminë e detarëve në Ranë, por për shkak të vonesës ai këtë e bëri në Tivar të vjetër. Dje Davutogllu ka qëndruar në Dubrovnik ku ishte njëri nga panelistët në tubimin mbi energjetikën e Evropës juglindore, ndërsa paradite në Budva ka folur me kolegun e tij malazez Igor Llukshiq.
Mysafirin e lartë nga Turqia, në përcjellje të cilit ishte dhe ambasadori në Podgoricë Mehmet Nijazi Tanilir, e priten kryetari i Ulqinit Nazif Cungu me zyrtarët e tjerë të komunës, si dhe udhëheqësia e Bashkësisë islame. Kryeimami Ali ef. Bardhi i foli Davutogllus për historinë e Xhamisë së detarëve duke theksuar që ajo është rinovuar me mjetet e donatorëve nga Turqia. Ai Davutogllus i dorëzoi fotografinë me panoramën e Ranës nga fillimi i shekullit të kaluar në qendër të së cilës gjendet pikërisht ky objekt fetar.
Ministri i punëve të jashtme të Turqisë është falënderuar për dhuratën duke theksuar që “Ulqini është shumë qytet i bukur”.
Mbas Ulqinit ai do të vizitoi dhe Shkodrën. Të shtunën, ministri Davutogllu do të takohet me Ditmir Bushatin, shefin e diplomacisë shqiptare në Tiranë, ndërsa në orët e mbrëmjes do të kthehet në Stamboll.
Kjo vizitë është edhe një tregues se sa rëndësi i kushton Turqia bashkëpunimit regjional dhe marrëdhënieve të mira fqinje me shtetet ballkanike.
